Kvennaráðstefna ASÍ 2023, haldin dagana 28. – 29. september, skorar á miðstjórn ASÍ
að tryggja að kynjajafnrétti gangi sem rauður þráður í gegnum alla vinnu í tengslum við
kjarasamninga í vetur. Enn fremur telur kvennaráðstefnan að miðstjórn ASÍ eigi að taka
af fullum þunga þátt í verkefninu sem lýtur að því að leiðrétta skakkt verðmætamat
kvennastarfa og innleiða jafnvirðisnálgun starfa. Í því felst endurmat á kjarasamningum
og á starfsmatskerfum þar sem matsatriði varðandi hæfni, ábyrgð og þekkingu verði
hugsuð frá grunni.
Kvennaráðstefna ASÍ 2023 telur löngu tímabært að beita kjarasamningum til að leiðrétta
sögulegt vanmat á kvennastörfum. Konur og innflytjendur eru í miklum meirihluta í þeim
stéttum sem eru með hvað lægst laun og búa við kröppust kjör. Þetta kallar á
samfélagslega leiðréttingu á mikilvægi þeirra starfa sem þessir hópar vinna.
Verkalýðshreyfingin leikur þar lykilhlutverk.
Kvennaráðstefna ASÍ hvetur aðildarfélög til að tryggja þátttöku kvenna í
samninganefndum. Kvennaráðstefna telur mikilvægt að sameiginleg vinna ASÍ við
kjarasamninga hefjist þegar í stað og það er hlutverk miðstjórnar ASÍ að tryggja aðkomu
kvenna að þeirri vinnu, sem nær umfram skammarlegt kynjahlutfall í miðstjórn.
Kvennaráðstefnan fer fram á að miðstjórn vinni tillögur fyrir næsta þing ASÍ sem kveði á
um kvennakvóta í miðstjórn, málefnanefndum og öðru starfi ASÍ. ASÍ er eftirbátur í
jafnréttismálum í íslensku samfélagi, en ætti að ganga á undan.
Kvennaráðstefna ASÍ lýsir yfir þungum áhyggjum af kjörum ræstingafólks sem greind eru
í nýrri könnun Vörðu og nýlegum fréttum af hópuppsögn og frekari útvistun starfa
ræstingafólks, að þessu sinni á vegum Grundar og Áss dvalarheimila. Útvistun
ræstingastarfa, bæði hjá hinu opinbera og á almennum vinnumarkaði, hefur búið til
þrælastétt í íslensku samfélagi, stétt sem ekki deilir vinnuaðstöðu og kjörum með fólki á
sama vinnustað. Kvennaráðstefna telur að miðstjórn ASÍ eigi að beita sér fyrir innvistun
ræstingastarfa, það er að segja að þau verði tekin til baka úr útvistun og frekari útvistanir
stöðvaðar.